當年今日
關於我們

【賺錢買__戴】陳嘉寶同大台斟約條件:一噸金都OK

蘋果日報 2016/07/26 06:00

蘋果香港謝安琪陳嘉寶薪酬開幕KayAnjaylia即時娛樂有喜儲錢賺錢買金戴一噸金

以前話啲人打「風流工」,即係指嗰啲唔係家庭經濟支柱嘅女性,純綷賺多一筆錢等屋企再充裕啲嘅人係「賺錢買花戴」,不過今時今日,可以唔止戴花喇。

好似「邦民女」陳嘉寶(Anjaylia)咁,佢今日去咗機場出席鑽飾店Luvenus開幕禮,Anjay笑住話o依家要努力賺錢買金戴,因為佢離開咗模特兒公司JamCast,o依家努力尋覓新發展,佢話:「o依家開始要努力儲多啲錢,想送多啲金畀媽咪,等佢威吓。我想喺電影上發展,喺舊公司好多年,想出去試吓、闖吓。o依家要求係發展好,賺多啲錢買金戴。」

問佢大台有冇同佢傾合作?Anjay就話最近都有好幾間公司搵佢傾緊,自己就思索中,咁要幾多位數字薪酬先可以打動Anjay呢?佢話:「未講到咁深入,千萬?我梗係想,一噸金都OK。」

嘩嘩嘩!一噸金!唔知Anjay知唔知一噸金值幾多錢呢?一噸金大約等如二萬兩,如果以今日飾金金條嘅參考價格每兩約$13,000嚟計,Anjay嗰一噸金就值2億5,820萬,同佢「梗係想」嘅千萬都仲有相當大嘅距離喎……

另外,問到Anjay好友謝安琪係咪有喜?佢就話:「冇問呀!以佢嘅性格,有咩開心嘢一定會出嚟公佈,都祝福佢開心,有咩喜訊就更加開心。」