入行31年嘅黃德斌去年第二次離開無綫，日前佢就接受奇妙電視嘅節目《是敢的》訪問，分享番佢入以來嘅辛酸史。

身形高大嘅黃德斌，未加入娛樂圈前，其實係做雜誌嘅模特兒，後來因為錢同一個男人，佢先會決定入行。德斌係大台第14期藝員訓練班，同期同學就有黎芷珊、劉錫明、林家棟、雷宇揚、陳家碧等，畢業後就加入大台。佢話：「我原本做雜誌模特兒，當年因為林俊賢叫我考入藝訓班，我諗住都係表演啫。我自己一心想搵多啲錢，但當然結果唔係咁。」德斌嘅銀色旅途並唔係想像中咁順利，佢話自己入行初時主要拍動作片為主，自嘲自己似一個動作演員：「指導叫我由三樓跳落嚟，我唔得就會係第二個上，咁我一定要得啦！」

但係佢嘅努力並未有獲得回報，1993年佢約滿無綫，不被續約，唯有轉到幕後發展，德斌憶述番當時嘅情況，佢咁樣形容：「我係非常晴天霹靂，打擊好大，覺得自己已經做生做死，但係都唔要我。不過自己對幕後工作都有好奇心，當時無諗自尊，只希望靠自己對手生存落去。」

為咗生存，德斌由幕前轉戰幕後，但佢就話幕後嘅工作令佢受盡委屈，然而呢啲經歷，德斌覺得只係人生嘅低潮，咁樣先能夠成就到今日嘅佢。於幕後工作四年，97年，佢重返無綫，接演長篇處境劇《真情》，飾演梁家明（越南）一角，角色深入民心，其後佢亦演過好多令人難忘嘅角色，好似《妙手仁心》入面嘅「江湖大佬」何德廣、《金枝慾孽》入面嘅常永祿「小祿子」等，直到06年，佢憑藉劇集《火舞黃沙》中飾演宋東陽一角，終於吐氣揚眉，奪得最佳男配角。

正所謂「台上一分鐘，台下十年功」，德斌曾經為演好角色，心情長期處於低位，最後證實患上抑鬱症，佢話：「當時無諗自己有病，都無錢睇醫生。但好神奇，有一日起身望到鏡入面嘅自己，心諗咁嘅衰樣唔怪得我唔掂！所以決定振作自己，每日都提自己開心啲！」o依家德斌覺得做人要有正能量，要識得感恩。

去年，德斌扚起心肝決定再度離開娘家，展開人生第二場戲，佢笑言：「離開係隨心，想試多啲野，可能因為我百厭！我唔安於現狀。」講到多年來最大嘅遺憾，德斌好感慨咁話係已經離世嘅媽媽，佢話：「我媽媽好鍾意睇電視，所以好鍾意我做娛樂圈，但佢臨走前我嘅事業未有起色。」德斌話自己堅毅嘅性格係來自母親，雖然媽媽已經離開咗佢，但係佢嘅叮囑同鼓勵，至今仍深深烙印在腦海中。

精選娛聞，喺晒《娛果》
http://fb.com/appledailyent