韓國人氣男團EXO嘅中國成員Lay獨自留喺大陸賺人仔，已經少咗現身組合活動，令到唔少EXO粉絲大感不滿，不過Lay人氣依然極高。之前佢孖孫紅雷、黃磊、黃渤、王迅、羅志祥等人拍攝嘅內地綜藝節目《極限挑戰》勁受歡迎，節目前日開拍第三季，6位成員喺佛山逗留兩日拍攝後，今日就移師香港繼續拍攝，據知節目組會留到聽日。

今日6位成員都以全黑打扮，有粉絲捕獲到6人喺油麻地天后廟拍攝，並指今日嘅嘉賓係黃宗澤(Bosco)。不過之後6人就分開咗活動，似乎係各自去完成任務。而Lay就被拍得喺雨中打籃球，粉絲紛紛留言叫Lay要注意身體，唔好感冒。