面對政府產業署多年來嚴苛兼官僚嘅管理手法，土瓜灣牛棚藝術村班藝術工作者一直好鬼嬲，點知最近連掛塊橫額出嚟控訴吓嘅言論自由都被剝奪埋，谷鬼氣之下，決定趁萬聖節快到，喺嚟緊嘅10月23日（星期六），搞個「牛棚搵鬼去土炮哈囉喂」活動，等平日難得入去牛棚行吓玩吓嘅街坊市民，可以一齊「舞牛」、睇鬼片、講鬼古、食南瓜西米露，仲費用全免。

街坊整南瓜小食應節

活動搞手程展緯話，當日下午4點會先嚟個公開討論會，畀大家傾吓牛棚同社區關係嘅可能性，到6點差唔多天黑，就會舉行「千人同心齊舞牛」。佢哋家仲整緊個牛頭，到時會連住塊好長嘅橫幅，寫滿佢哋對產業署嘅訴求，當晚會喺牛棚出面舞動，隨時媲美舞火龍。
同場仲有「鬼影都唔多隻靈異攝影比賽」。程展緯話，聽講產業署署長郭家強本身鍾意玩相機同攝影，好似話連屋企都有黑房，但牛棚嘅公共範圍就唔准人隨便影相兼限制多多，搞到平時鬼影都唔多隻，所以咪搞個攝影比賽嚟冲喜吓，歡迎參賽者用電腦執相，製造靈異效果，等牛棚熱鬧啲。
佢哋本來仲想向街坊徵集土瓜灣鬼古，但班街坊唔知係咪驚啲鬼古嚇親人，搞到冇人敢嚟土瓜灣，所以初步反應麻麻，但唔講鬼古可以睇鬼片，啲鬼片主要來自YouTube嘅靈異片段，到時大家一齊睇，會好有氣氛，街坊仲會整啲南瓜小食，應應節。

產業署管理措施極差

牛棚藝術村嘅村民希望透過今次活動，吸引班街坊同公眾嚟認識牛棚、融入牛棚，亦順便發洩一下多年來對產業署嘅怨氣。佢哋話，產業署喺牛棚實施好多唔合理嘅管理措施，例如要出入牛棚嘅公眾人士登記，有時又要嚟睇展覽嘅市民出示邀請卡，學生嚟參觀又要申請之類，總之搞到牛棚好封閉，同個社區好分隔，喺附近居住或者做嘢嘅街坊好難入去行吓坐吓，同藝術村嘅原意根本背道而馳，亦完全反映特區政府對待文化藝術嘅官僚態度。

mailto:[email protected]