當年今日

咀敵人 你開心

蘋果日報 2008/10/06 00:00


股市焦晒,荷包輕晒,S加兩戙唔見晒。想話食餐好啦,又爆單三聚氰胺,憎人富貴恨人窮,呢個世界真係咁Nofun?唔好咁諗,今日就教你一個釋放仇恨嘅方法。《馬太福音》話:「要愛你的敵人。」計我話唔止,錫埋你敵人啦,包你開心呀。

記者:王震遠
協力:許維雅
攝影:譚盈傑、周錦文
模特兒:Ana&[email protected]
鳴謝:臨床身心行為學家李寶能
empty
摩連奴:國際米蘭招積教頭,鍾意撩交嗌,挑起口角博見報博出位。
empty
梁國雄:毛哥一向行為出眾,俾人乜都為反對而反對嘅麻煩友形象。
empty
張如城:潛伏七年借奧運攝位派新歌,其貌不揚配合騎呢舞姿,好攞命。
empty
陳水扁:樣猥猥瑣瑣,家庭涉嫌海外洗黑錢,天下第一貪當之無愧。
empty
富爾德:雷曼兄弟總裁,宣佈破產後一班苦主血本無歸,憎佢,有理。
empty
江若琳:雜誌封面大字標題,話佢介入老闆婚姻,扮喊好戲等攞金像獎。
一吻解千仇
錫敵人?聽落無稽,但唔該記住,雖然無度量衡,但仇恨呢家嘢真係會越積越多,行出第一步釋放怨氣,先可以將仇恨減磅。咪當我生草藥噏得就噏,問過臨床身心行為學家李寶能意見,佢話:「錫係一個接觸敵人嘅行為,做任何行為,本身都一定會隨伴住情緒。古代人好直接,錫一個人就代表鍾意佢;現代人複雜,懂得將行為同精神割開,即係話,錫敵人唔等於因為鍾意佢而錫佢,呢個行為係就係做咗,但心靈其實係真空,毫無實質情緒。
「錫敵人,其實係透過錫呢個行為去進行心理調整,改善自己精神狀態。錫嗰陣會衍生其他情緒,錫嘅次數越多,就會潛移默化累積番應有嘅開心情緒,屬於一個勞動治療法,由怨恨變成容納自己敵人,再變成釋放出自己仇恨。行第一步係好辛苦,不過去到尾,錫敵人結果一定會令自己開心。」
洗腦=性格大變?
唔少人會借助所謂嘅洗腦Course解脫心鎖,而坊間某啲保險公司或者大機構,都會安排員工修讀。過來人有基金投資理財顧問Andrew,佢讀過Asiaworks嘅BasicCourse,「呢個最低層次嘅Course盛惠$6,000,強調修讀後可強化愉悅同更新生命方向感。我見公司有好多搵到錢嘅同事都讀過asiaworks課程,好奇咪讀吓囉,不過課程又無特別指定要錫你嘅敵人,反而係透過活動同遊戲,令你發現自己同敵人其實好相似,敵人做嘅嘢,有時自己都會做,好自然就會嬲唔落,跟住原諒佢。最終令你明白憎一個人,蝕底始終係自己,浪費時間去嬲人,不如慳番時間搵錢好過。」成效呢?「只可以話我唔算改變好大,但其他同學就反應好激烈,釋放到自己一刻,我見到佢哋喊晒癲晒咁,喺街見到人就攬囉。」吓?見人就攬?唔係啩?
講到天花龍鳳,但有唔少網友對Asiaworks課程有微言喎,有網友用「方式與邪教相近」形容課程,有網友又話:「……有很多friend講返佢地dexperience……有個老婆上完同佢離婚……以我所知,很多人上完都會性格大變的……」咁恐怖?(參考網址: http://hk.myblog.yahoo.com/invest1314/article?mid=922)
empty
AsiaworksLtd
地址:上環干諾道中148號粵海投資大廈6樓
電話:28034455
查詢: http://www.asiaworkstraining.com
街訪:街頭索吻
敵人,總有一個喺左近,但要搞到犯眾憎,點都要有番咁上下道行。做街訪,嚴選見到都眼火爆嘅風雲人物,揀唔啱可以自己提名,兼且叫受訪者當眾咀佢一啖,結果最人民公敵嘅始終係──特首。

問題一:同佢有乜仇口?
問題二:信唔信錫敵人會令自己開心啲?點解?
Cherry揀曾蔭權:「副局長單嘢已經唔like佢,佢好假;都信錫佢會開心,錫佢即係代表寬恕佢。」
empty
PendiaCao揀梁國雄:「他常常罵政府,所以不喜歡。雖然不知原因,但我會試着相信。」
empty
Candice揀梁國雄:「佢好煩,成日搞事,都唔知點解會當選;都信嘅,點都叫做行出第一步嘛。」
empty
肥文揀摩連奴:「我係曼聯Fans,梗唔鍾意佢啦,佢太囂張;都會信,但做唔做到又係另一回事。」
empty
Carrie揀江若琳:「扮晒嘢,好假,扮喊博同情;我信喎,錫敵人應該可以令自己開心番。」
empty
Beat揀張如城:「佢個樣好難頂,唱歌又難聽,都唔知佢唱乜;唔信,應該會嚇親人。」
empty
Sam揀江若琳:「太造作,太多負面新聞;唔信錫敵人一啖自己會開心啲,應該唔Work喎。」
empty
越恨越傷心
人人都腹可撐舟,呢個世界就無所謂嘅敵人啦,唔少人敢怒不敢言,唔敢明刀明槍反面,就會搵另類方法發洩,例如打小人、貼敵人車頭相當佢係箭靶、無時無刻喪鬧喪詛咒,呢啲方法究竟可唔可以令自己開心啲呢?李寶能裁定:「一定唔得,都無謂講到咁複雜,簡單啲講──越恨越傷心,因為情緒會牽涉身體內分泌,負面情緒會令身體積存更多毒素,結果當然會越嚟越唔開心啦。」
問:寫低敵人個名,打佢小人,會令自己開心?

答:可以釋放到部份情緒,表面上憤怒係少咗,但實質個量無變,越打只會令情緒越高漲,情緒越高漲就越憤怒,發洩完又回復一樣,因為事件性質無變過。
empty
問:貼車頭相當佢箭靶咁射,發唔發洩到怨恨?

答:同打小人一樣,性質充滿傷害性,一樣越射越唔開心,當你睇到佢張相,憤怒又自自然然湧上心頭,射多一次,唔開心情緒只會攻擊多自己一次。
empty
問:只喺內心詛咒,唔透過實質嘅暴力發洩呢?

答:詛咒,對方其實聽唔到,即係自己講說話畀自己聽,100%自己受番晒,只會提升自己怨恨,弄巧反拙㖭呀。
empty