明日（2日）新馬季開鑼，編跑十場，全草地用B跑道角逐，近期天氣欠佳，連場大雨對場地多少有影響，帶來不明變數。

季初報名馬一定唔多，但賽事形勢卻十分緊湊。翻查數據，近三季開鑼戰，華倉如沈、徐及賢廐都交出好成績，可優先留意。

第五場四班1200米：「勁無比」上季跑三場，熱身後循序漸進，在同程出擊，僅以頸位負於由莫雷拉策騎之「蟲草之星」，既有速度，鬥落也毫不遜色，敗給一匹質高佳駟，反映本身也能力甚強。

今季復課保持好進度，由潘頓試閘，夠快夠韌帶放勝出，收身靚情緒越見集中，成熟狀態均邁進，以其速度，雖排外檔應可切入守好位，甚至採取帶放戰略，贏面甚高。

「盛勢」上季尾在五班贏1400米，暑期去從化訓練，返港隨即復課，有兩課快工夫，身壯紮實走勢爽朗，狀態好對辦。

論馬夠於第四班立足，勿因潘頓唔揀而輕視，做好走位留放，可爭入前列。

「愛飛一號」雖然未入三甲，但上季同程跑殿軍，僅負一頸位，馬夠速度排檔唔曳，用黃俊減十場，會大有幫助，有機會提升名次。

「歐洲巨星」拍跳奮力肯走，輕磅可擺前領放之馬，有權爭冷腳。

「香江世億」韁口改善成熟勝上季，但演出唔可靠，先觀望一場。「快利」有備而來具爭勝水準，但負重限於爭位。

其餘「銀照收」新馬賽能贏，但暫時進度未如理想。「醒目再臨」神態未夠旺，路程也嫌短。「猴王駒」試閘力騎都唔走。

「人和家富」彈閘頗急勁，熱身後返谷草才吼。「財帥」夠速度，大閘省後有進，可留意走勢。「幸運精選」及「同威」進度徘徊。