打探之下，張相係噚日朝早喺香港國際機場影嘅，位置大約係南北跑道之間空管中心對出嘅空地，應該係禁區。據一位地勤人員講，呢個「美景」喺兩年前開始已經存在，產生原因係機場地面維修不善，只要有雨或者濕氣重，特別係朝早時分，就會有大灘積水。
天空之鏡睇落好靚，空管中心同飛機倒映水中，好似香港人想要嘅真普選咁，鏡中花水中月。但係路面積水，莫講話唔適宜游水，對經過嗰度嘅航機都有危險。據講有航空公司向機管局投訴，但情況未見改善。
費清問過機管局，對方就話派人去睇過，並無發現相中積水，亦都冇收過任何舉報。唔通呢灘水係海市蜃樓，同CY口中來歷不明嘅小朋友一樣，都係幻覺？