港視自家劇嘅存貨近清，踏入倒數時刻，唱作女歌手陳詩慧(Eva)喺近日播放嘅《NightShift》中亦豁出去，喺今日播放嘅一集內，扮演斷背大家姐霸氣登場，劇中Eva以漂染短髮及中性look出現，其中一幕講述佢被古惑仔灌酒兼追打，幸獲湯怡救駕，因而對佢嗒糖，湯怡卻笑佢不過女人一個，說時一手摸向Eva胸部；咁仲不特止，隨後仲有一幕戲，就係Eva爭少少咀到湯怡BB。

提起摸胸鏡頭，Eva笑說：「我尷尬0架，其實佢『係咁易』摸我，都有啲借位嘅，但第一次畀女人摸個胸，感覺好特別。」以前Eva都拍過斷背MV，加上本身性格男仔頭，問佢會否被誤會走上「斷背山」？佢就老定咁話：「作為一個專業演員，絕對冇問題啦，正如我喺《導火新聞線》做白粉婆角色，個個都話好似，唔通我又真係走去食白粉咩。」

其實佢拍《NightShift》最難忘係被打：「嗰場戲被隊酒，飲嘅係真酒，我仲拍咗好多被人打嘅戲，只可惜cut咗，係堅打0架，雖然我墊咗pad。最好笑係導演話我墊咗pad可以大力啲打唔會痛，佢示範時真係一鎚一鎚窩落嚟，我呆咗囉！導演，其實痛0架。」

Eva被不少網民讚佢扮斷背大家姐夠型，反而佢要多謝吳君如：「我拍呢套戲之前，已經睇咗三千幾次《洪興十三妹》。到我知道接拍呢個角色之後，再睇多六千幾次，所以我係好感謝吳君如嘅啟發，令我偷到師，都算做得ok啦。」