每位男士心底裏都有一個英雄夢，即使係財爺曾俊華同商經局局長蘇錦樑都唔例外。噚日兩個人山長水遠去咗香港迪士尼樂園，為全亞洲獨家嘅「星球大戰：入侵明日世界」項目揭幕，上到台仲一人拎住一把光劍做道具。
玩開劍擊嘅財爺當然駕輕就熟，笑笑口咁擺好pose畀一眾攝記任影。勢估唔到旁邊嘅Greg So居然更加投入，雙手揸住把劍即時絕地武士上身，半踎紮行個馬，面部表情相當肉緊，十成十當正前面嘅人都係帝國軍準備開戰咁款。

新任CEO晒廣東話

財爺發言嘅時候話，《星戰》係劃時代嘅科幻電影，自己本身都係fans，1977年首映時，身在波士頓嘅佢都有買飛入場睇，𠵱家喺香港就有得玩，令到一班星戰迷夢想成真。佢仲提市民同星戰角色Chewbacca自拍selfie嗰時，千祈唔好俾對方古怪嘅聲音嚇親，「佢可能係想提大家，樂園係唔畀用自拍棍。」
番書仔出身嘅香港迪士尼新任行政總裁劉永基噚日第一次見記者，全程用廣東話對答打破唔識中文嘅傳聞，但遇到唔識嘅名詞都仲要旁邊嘅公關幫手繙譯。佢話樂園keep住有新項目推出，加上主打華南同東南亞客，唔擔心俾上海迪士尼分薄客源。
樂園由即日起到7月15號推出港人專享優惠，一次過買3張飛1,302蚊，買4張就1,616蚊，分別比正價平315蚊同540蚊。

李八方
mailto:[email protected]