新民黨主席葉劉淑儀真係可謂花生友嘅最愛，永遠都有無限嘅話題，畀政界中人茶餘飯後熱議。仲講緊葉劉晒大腸照晒出個大頭佛？Out晒啦，最新鮮滾熱辣梗係佢話自己唔係一條跑道，唔應該俾人作為政途上嘅起跑點，借此暗寸佢嘅前愛將、啱啱升呢做政制及內地事務局副局長陳岳鵬，當初親近佢疑似係要為入政府鋪路。
葉劉自比飛機場，政圈中人無不話佢呢個比喻好啜核；邊架飛機有興趣喺佢跑道上「起飛」？真係令人想入非非。但查實政圈中人笑笑口之餘，都戥陳岳鵬陰功豬，皆因有時際遇呢啲嘢，可遇不可求，相信陳岳鵬都未必預計到；而個黨多咗個副局長，都係「榮譽」吖，點解葉劉仲嬲嬲豬呢？