西甲經過上周末嘅比賽之後已經進入歇冬期，各隊球員都放假輕鬆吓，巴塞隆拿球星碧基同馬德里體育會嘅基沙文，就不約而同去咗紐約睇NBA聖誕大戰。

巴塞啱啱喺國家打吡大勝皇家馬德里3:0，碧基當然心情大好，日前為贏波花咗幾千歐元開紅酒嘅佢，平安夜帶埋女友Shakira同兩個小朋友去咗紐約，聖誕正日就去咗睇紐約人主場對76人嘅NBA常規賽，一家四口坐喺場邊觀眾表現得好開心，順便打破埋早前話碧基同Shakira已經分手嘅傳聞。

至於馬體會雖然歇冬前最後一輪比賽以0:1輸畀愛斯賓奴，但基沙文心情就似乎冇受到太大影響，佢趁住放假去咗睇NBA，仲喺個人Instagram放咗張自己喺紐約人個場館入面影嘅相，寫住話係NBA聖誕大戰，另外，同場仲有皇家蘇斯達嘅伊拿拉文迪，佢都喺Ig分享咗自己喺呢個場館嘅相。唯一比較可惜嘅，可能係紐約人雖然有西甲球星嚟撐場，最後都係輸咗畀到訪嘅76人啦！

----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM