祖高爾喺兩個月前先至係英格蘭嘅邊緣球員，但係喺今屆世界盃，分分鐘做咗艾歷臣嘅秘密武器。
今年只得二十歲嘅祖高爾，早排喺英格蘭嘅友賽表現毀譽參半；雖然佢最後都俾艾歷臣選咗去日韓踢世界盃，之但係就冇人認為佢有正選打，覺得佢係後備居多。
不過，謝拉特因鼠蹊受傷肯定缺陣，而受膝傷困擾嘅戴亞又未知打唔打到，唔單止令剛續約利物浦五年嘅後補梅菲有份打，重搞到祖高爾無端端上咗位。
其實，有睇開英超聯嘅朋友都應該知道，祖高爾呢個小朋友波底幾好，傳得又扭得，亦都係咁嘅原因，英國傳媒先封佢做成「新加斯居尼」。
記得加斯居尼喺九○年嗰屆世界盃係着「19號」衫，重一戰成名㖭。唔知喺今屆世界盃又係着「19號」波衫嘅祖高爾，會唔會好似加斯居尼咁威水呢？

亨利識𠱁英球迷
今屆幫阿仙奴攞走超聯同足總盃雙料冠軍嘅法國前鋒亨利，唔單止好波，重好識得講說話。話說佢早排公開大讚英格蘭，重話如果法國喺今屆世界盃衞冕失敗，就希望英格蘭可以成為冠軍。佢咁識得𠱁啲英格蘭球迷，真係抵佢都咁受啲阿仙奴球迷歡迎。