爵士上北京，接受施洗，領完聖體，回港即時出席立法會答問！
無論問同答，都屬老生常談，冇厘新意！反為政務司司長肥龍嘅新職，就遲遲未正式公布，各路人馬，利用呢個空檔，紛紛搶啪針，聲稱肥龍前任新鴻基高層，收過一千萬，話佢做咗政務司司長，就唔適合主持西九龍分豬肉大典！

歌劇之王品味國際化

肥龍做政務司司長，由中方欽定，又點會俾一兩支墮胎針就啪到流產？做到宰相，就梗係全力主持西九龍文化「偽術」區分豬肉大典，西九龍唔係佢操刀，邊個操？
肥龍做過亞洲藝術節主席，正牌鑑賞家，在政府高官之中，唯一精通西方歌劇，由《阿依達》至《卡門》，由《費加羅婚禮》至《蝴蝶夫人》，三百年來，大小劇目，各隻版本，肥龍如數家珍，聽講多年前佢係遠東唯一嘅歌劇精，可以憑記憶用意大利文全劇背出台詞嘅人㖭！現時老咗記唔記得番，就唔知嘞！
煲呔係天主教徒、英國爵士，夾條肥龍，又係歌劇之王，呢副牌面，靚就靚在與國際接正軌！肥龍出名歌劇狂，鍾意自己一支公坐頭等機位，飛去羅馬，再轉往維隆那，睇一場正宗嘅《阿伊達》，跟住再轉坐內陸機直放維也納，睇多套《唐璜》，一個longweekend，神不知鬼不覺歎一轉世界回港，再坐入馬會夜馬包廂，施施然填表落注！
高尚人士，品味國際化，唔係去黃大仙廟求完籤，腳底按摩，跟住又傍住啲大陸富豪入東莞打高爾夫球嗰隻。

後生時組織過電影會

壽爺睇中肥龍，欣然批准上位，可能就係睇中佢啲歌劇知識，可以一鋪大晒有扮嘢王之稱、最鍾意唱《OSoleMio》嘅江太祖，呢啲內幕，官場就冇乜人知嘞！
肥龍後生時重有份組織過電影會StudioOne，開口杜魯福，埋口費里民，同荷李活大導演吳宇森，份屬知音，呢一層肥仔達佢又知唔知？連區議會主席想扮嘢，都扯住肥龍衫尾叫佢帶隊去睇歌劇，不過聽講肥龍鍾意單拖自賞，應酬帶團，到埗後多數賣甩佢哋去唐人街食雲吞麵算數，然後自己一個人低調閃入劇院！
肥龍撈過新鴻基，你估做咗西九肥龍之後，行慣江湖嘅佢，會唔會咁蠢，公然搭條水喉畀郭家？西九肥龍主大局，管埋藝術嗰瓣，除非阿爺唔制，其他人都好難推翻大局囉！

傳真︰2623-9278
電郵︰[email protected]