【本報訊】若非當年決定由廉署重返民主黨，新一屆立法會未必有一位廉政先鋒。林卓廷坦言太太當時極力反對，險些家變。
林卓廷中大畢業後就到民主黨工作，2007年因不滿黨的安排而離職，轉投廉署擔任調查主任，他笑說：「過咗3年安樂日子。」前主席何俊仁2011年邀請他回巢，出任總幹事，「仁哥話『如果你想下半生過住安穩生活就留喺廉署，但如果你想喺呢個大時代發揮同貢獻就返嚟民主黨』，聽完後令我醒覺，當時心裏面決定返去，但要過老婆嗰關。」

高大樣惡常帶隊拉人

他用3日時間游說太太，但她極力反對，「佢哦足我3日，不斷質問我係咪諗住返去？有冇考慮過屋企未來？佢更加大喊同用力打牆，從來未見過佢情緒咁激動，嚇死我」。幾經思量後，他堅持回黨，至重返民主黨後一年，太太才開始接受事實。他承認對太太有虧欠，「我揀咗一條暗晦不明嘅路，作為太太同母親角色，佢係有道理」。
林承認性格強硬嚴肅，外表兇惡，絕不向惡勢力低頭，自言與黨友鄺俊宇走不同路線，「我喺廉署時，上司叫我做team leader，帶隊拉圍標主腦，呢啲人通常有黑社會背景，因為我夠高大（6呎4吋）兼且嗰樣夠惡，可以壓得住對方」。
■記者謝明明