一齣《來自星星的你》將韓劇熱潮推向另一高峯，原來阿里巴巴創辦人馬雲都有睇韓劇，佢噚日喺自己個來往扎堆（類似面書專頁）借題發揮，以韓劇男星多數扮演「弱勢需要保護的群體」，顯示今時今日女人越來越有地位。
家有賢妻嘅馬雲可能有感而發，喺扎堆開首冇耐就問「現在還有多少家庭是由男人們說得了算？」，話女性𠵱家唔單止走出廚房，而且控制咗客廳㖭。
佢指，企業嘅女董事長、女CEO、女董事人數都增加緊；最可怕係以前睇電視、電影都係睇靚嘅女演員，係女人演畀男人睇為主，𠵱家就係男人演畀女人睇，男演員都盡力吸引女觀眾，因女觀眾係收視率、票房。佢咁講又啱喎，好多女仔、師奶追睇《星星》，其中一個原因咪就係男主角金秀賢型到爆囉。
不過，馬雲冇提《星星》入面成日保護女主角嘅金秀賢，反指韓劇男星多數演繹車禍、癌症、患上神秘不治之症嘅弱勢需要保護群，意指女權當道喺韓劇反映晒出來。

馬雲唔提《星星》都無可厚非，事關佢對手騰訊（700）旗下微信一早借劇中「炸雞與燒酒」條橋搞花臣吸客，馬雲唔想長他人志氣都未定。
講開馬雲，阿里與騰訊最近接連收購呢樣嗰樣擴版圖，噚日就有傳聞指，內地互動娛樂內容營運商盛大有意將盛大遊戲、盛大文學等五項業務打包賣畀阿里，作價最高273億元，不過阿里方面旋即否認。

李華華
mailto:[email protected]