當年今日
關於我們

隔牆有耳:熊貓會副會長做雙面人 - 李八方

蘋果日報 2009/10/14 06:00


港珠澳大橋份環評報告,各環保團體都十分關注,事緣份報告做得好渣,好多問題例如保育中華白海豚或噪音滋擾等等問題,都未作出令人滿意交代。當中以向來甚少發聲嘅富貴環團世界自然基金會(俗稱熊貓會)就最積極,早個月先聯同一批關注人士開記者會。
不過,向公眾大大聲表達關注,同喺諮詢架構內表態絕對係兩回事。日前環境諮詢委員會開會傾呢單嘢,作為熊貓會副會長嘅捷成漢(HansMichaelJebsen),竟然唔聲唔聲支持通過份環評報告,有份開會嘅人透露,當傾到熊貓會最緊張嘅中華白海豚問題時,捷成漢講咗幾句,最後投票就跟大隊同大圍一齊支持通過。
最搞鬼係環評通過當晚,熊貓會即時出聲明,對通過環評報告表示極度失望。有環保人士對熊貓會表裏不一好疑惑,唔通佢哋精神分裂?八方搵過基金會,佢哋話捷成漢出外公幹,未能了解詳情,不過佢哋強調,捷成漢係以個人身份獲委任為環諮會成員,基金會依然對事件感失望。