阿儀現居於深水埗舊唐樓一個套房,記者登門造訪,先要爬上四層黑漆漆的樓梯,再穿過一條走廊,方才抵達她的家門。「呢一區雖然比較雜,治安冇咁好,但勝在包租公好人,當年我帶住個女,冇錢又冇地方落腳,包租公冇同我計較,乜嘢上期、按金都冇收我,就畀我哋喺度住。」斗室雖小,但洋溢的溫情,暖透這位單親媽媽的心。
團聚三月夫自殺
三十七歲的阿儀,經歷過人生最黑暗的時期,若非人間有情,她一定捱不到今天。兩年前,阿儀帶着當時還在襁褓的女兒汶汶,由內地來港與夫團聚,惜甜蜜的生活,只維持了短短三個月。在去年情人節晚上,阿儀的丈夫突然留下遺書,透露經濟陷困,並注射藥物自殺,遺下母女二人。
「嗰段日子,我老公剛剛失咗業,我同個女又嚟咗香港,我知道佢壓力好大,好唔開心,但我冇諗到佢會咁儍。」阿儀欷歔歎道,如今只好身兼父職,專心撫養汶汶成人,這亦是亡夫的唯一遺願。