【拍戲要等Prove】色情.暴力.殺人狂 Eric戲路定型多得太太葉佩雯?
葉佩雯郭偉亮Eric Kwok老笠詭探前傳
Eric Kwok(郭偉亮)一向沒有形象包袱,入行以來勇於創新,無論音樂、電影都愛玩新意。
戲外Eric是個循規蹈矩的好老公,不過螢幕上他卻甚少做乖男人,角色大部份偏向狂野,床戲、咀戲連場,更做過變態殺手姦屍:「咁多年我都好favorite我太太,所以如果拍戲有得抽離現實,攞正牌去做嗰陣我會好享受。我講笑!哈!」半開玩笑半認真!不過葉佩雯的大方也是有底線的,所以Eric亦懂得「見好即收」。
「初時接電影《老笠》時,我飾演嘅江湖大佬同崔碧珈好多親熱戲,我有同佢報定案。但佢知我好鍾意馮粹帆,佢當時好大方話『你做啦!我會嚟片場睇你』,我仲叫佢千祈唔好,我連自己都未顧掂呀。好奇怪!接完呢齣後,齣齣都有啲關於性嘅嘢,接到第三、四齣,太太就覺得係時候要停。佢覺佢開始頂唔順,咁我都明白,亦多謝佢俾我試咗幾次。所以之後我都少再接呢類角色。其實接呢類角色係因為好搶好吸引,加上我對演戲又產生咗濃厚興趣。」
而最近Eric更夥拍鄭少秋拍劇集《詭探前傳》,在劇中飾演一個驅魔警司,與飾演資深道士的秋官勁多對手戲。原來他是秋官忠實擁躉︰「我拍呢齣劇差唔多每場戲都有秋官,真係絕對值回票價。佢真係好尊業,佢好注重自己外表,埋位前一定會潄口,佢好清楚自己個角色,個妝自己化,個頭自己梳,一絲不苟。佢就連我嘅對白都好清楚,若我講錯佢會即時指正,能夠跟咁嘅前輩學嘢真係我嘅榮幸。」
「我自己本身都好鍾意睇靈異嘢,拍之前我仲同導演去搵個真係驅魔嘅神父取經。原來驅魔嘅經文,即係嗰段聖經一定要全篇唸晒先可以完成驅魔程序。不過後來我上網查過嗰段拉丁文,佢話原來如果你唔係神父絕唔能夠唸嗰段嘢,搞到我鬼咁驚。後來導演俾我唸嘅係好簡單!咁都OK,我都驚招惹到啲污糟嘢㗎嘛。但我用拉丁文喺屋企練習嗰陣,都嚇親我太太。」
化妝︰ Circle Chong @AnnieGChan
髮型︰Adrian Tong
場地︰FUMI
精選娛聞,喺晒《娛果》
http://fb.com/appledailyent
Eric Kwok(郭偉亮)一向沒有形象包袱,無論音樂、電影都愛玩新意。
戲外Eric是個循規蹈矩的好老公,不過螢幕上他卻甚少做乖男人。
角色大部份偏向狂野,床戲、咀戲連場,更做過變態殺手姦屍。
最近Eric更夥拍鄭少秋拍劇集《詭探前傳》,與飾演資深道士的秋官勁多對手戲。