美國人賓架K因在銀行工作四十年,退休後復出做合規工作,話明做幾耐都得,唔驚炒魷魚,佢又鍾意做噃,唔嫌辛苦。與佢拜拜之後,自太古廣場行到滙豐總行對面,碰到過往十年不做事嘅前記者T小姐,問佢:「近況如何呀?肯做工未?」記者T咪咪笑:「我做番記者嘞,負責法庭新聞。」左丁山不禁奇怪,前幾年見過佢一次,佢話唔做事去讀法律嘅噃,點解唔轉行做律師呢?記者T話:「我讀完法律啦,攞咗LLB,LLM(法律學士,法律碩士),但又唔想做律師咁辛苦,咪又做番記者囉。」哎吔,在中環做律師唔好咩,賺錢多,着靚衫,在歷山大廈,太子大廈,置地廣場返工,好醒目啫。記者T話:「我唔恨錢,唔多使錢,十年唔做工都餓唔死(因為之前嘅十年佢死慳死抵之故),點解要在中環打拼咁辛苦呀,做記者舒服好多!又唔使扮靚噃!」
有咁灑脫咁高哥利嘅人肯做記者,又唔計較人工,真報館之幸也。今天之女士好有性格,讀書多而唔恨上位,數吓手指,已有三位世姪女律師結婚之後就辭職離開歷山、太子,與怡和大廈,一位哈佛MBA回家湊仔,唔做ibank,另外世姪M上星期結婚,太太係四大會計師行之一嘅會計師,婚後可能辭工喎,唔怪得一位女強人曾好感慨咁對佢嘅千金講:「女仔讀幾多書都好,最好都係婚姻愉快!」