最近財經界熱話應該係阿里巴巴能否在港上市，還是要遠赴美國掛牌，港交所（388）CEO李小加睇住呢舊肥肉未必食得落肚，肯定焦急如熱煱上嘅螞蟻。佢除咗要跟證監會傾掂數之外，仲要應付有過牙齒印嘅立法會金融服務界議員張華峰喎。
今年4月李小加同經紀業界食晏聯誼，席間因語氣問題跟張華峰嘈咗陣，之後兩人都冇乜兩句。
張華峰噚日同傳媒茶聚，講到阿里巴巴，直指對方提出嘅雙股制「有少少過份」，合夥人制亦只係換湯不換藥，對投資者唔係好公道，反對阿里巴巴獲得任何特別優待。如果港交所就咁畀佢上市，就會破壞現行機制。話鋒一轉，張華峰認為，阿里巴巴能否在港上市，對港交所嘅盈利影響唔細，真係要「考吓李小加處事能力係點喇」，佢又寸嘴咁話，「（李小加）做好多嘢都認為自己正確」，即管睇佢今次諗到乜嘢聰明辦法。
張議員咁寸嘴其實不無道理，撇除兩人有些少過節，李小加舊年年薪加埋以股份支付酬金，總額逾2,400萬元，佢又係投行出身，如果咁想阿里在港上市，諗計度掂佢都好應份。