【新增影片】
阿仙奴中場韋舒亞家陣已經淪落到只係可以幫兵工廠喺U23嘅比賽超齡上陣，不過呢位英格蘭中場似乎仲係唔多生性，喺禮拜一晚場波因為推撞對方球員，食咗張紅牌畀球證趕出場。

韋舒亞係因為喺比賽中畀曼城U23嘅史密夫一下重腳兼遲咗嘅攔截「辣㷫」，雙手將對方球員推低。曼城U23嘅威爾遜即刻上嚟幫拖，觸發兩隊球員的一輪推撞，結果韋舒亞同威爾遜齊齊食咗張紅牌。有球迷影到韋舒亞喺行入球員通道之後，仲想同威爾遜開拖，最後要由球場保安介入先至可以分開兩位球員。呢場波係韋舒亞連續兩場U23嘅比賽，佢其實踢得唔錯，上半場交咗球靚直線助攻畀隊友射成3:1，兵工廠最後喺曾經領先4:1嘅情況下，贏4:3完場。