波齡有返咁上下嘅球迷，就算唔記得今日係咩日子，都應該記得雲尼斯特萊同阿仙奴球員交惡嗰場「魔兵大戰」。原來14年前嘅今日，正正就呢場波。

嗰季就係阿仙奴喺英超史上最引以自豪嘅不敗球季，而季初曾經同曼聯發生過不愉快嘅一幕。事緣喺比賽進行至80分鐘，時任兵工廠隊長韋拉同雲尼斯特萊爭波時跌喺地上，後者懷疑心有不甘報復出腳，雖然冇踢中雲佬，但雲佬就喺球證面前做出好誇張嘅表情，示意韋拉有動作，結果球證就拔紅牌驅逐韋拉離場，而以基昂為首嘅兵工廠一班球員，就非常不滿雲佬打小報告嘅行為。

去到完場前，雲佬再博到基昂喺禁區內犯規，球證判罰12碼畀曼聯，點知雲佬親自操刀宴客，基昂立即走上前對住佢大笑，而及後比賽鳴哨完結，基昂、羅倫及柏奴亞等人紛紛走去雲佬度，推撞佢甚至擘肘，最後雲佬要急急腳跑回更衣室，而C朗同科東尼等曼聯班隊友，亦同兵工廠球員出現口角，幸最終場面受控，未有動武。

場波雖然0:0，場面卻火花四濺，而基昂及羅倫等人及後紛紛被英足總重罰停賽及罰款等等，但亦因為雲佬呢球12碼唔入，兵工廠得以嗰季在最後以不敗姿態捧得英超冠軍。