已經4年無拍劇嘅《秘密花園》男星玄彬，早前落實演出新劇《HydeJekyll，我》，首次演繹人格分裂嘅角色。上星期，玄彬同劇組進行首次拍攝，地點位於韓國大邱嘅Eworld公園，花絮照亦於日前公開。

照片中，玄彬不惜抵冷喺水中進行拍攝，成件白襯衫都濕晒，不過玄彬似乎心情唔錯，而且表現得非常專業。有幸目睹玄彬真面目嘅大邱市民都大呼：「太靚仔啦！」、「好有男人味！」等。

《HydeJekyll，我》係SBS嘅新水木劇（逢星期三、四播放），改編自網絡漫畫，玄彬扮演一名細個時因經歷過可怕事故而患上雙重性格嘅遊樂園常務具書辰，會同由韓智敏飾演嘅雜技團團長陷入戀愛，新劇將於下月21日播出。