一講上市公司接班，通常只諗起長和、新地（016）、新世界發展（017）等大藍籌，查實二、三線上市公司都有接班問題。做電子產品嘅王氏港建（532），主席王忠桐接受《爽報》訪問，話寶貝仔王賢誌（Vinci）冇興趣接棒，可能要交畀女婿張瑞燊接手。

王賢誌唔志在

年近70嘅王忠桐深知阿囝脾性，話Vinci讀Marketing出身，對宣傳工作有興趣啲，未必想打理成間公司，所以佢培訓緊女婿、即係Vinci妹夫張瑞燊，無論見客定出差都會帶埋佢去。其實女婿等於半邊仔，王主席應該冇後顧之憂啦。講番做藝員同主持出身嘅Vinci，唔知係咪習慣咗公仔箱五光十色嘅生活，佢依然好熱衷面向群眾，好似王氏港建旗下做中藥保健產品嘅三皇集團，就係用佢同埋四哥謝賢嘅嘜頭做生招牌，果然係搞宣傳的。