【工作唔如意發脾氣】吳日言離家出走 Yan爸:唔使驚,我養你囉
吳日言父親節
於單親家庭長大嘅吳日言(Yan),15年前因為愛犬拉近同爸爸嘅距離。上年Yan結婚,Yan爸將女兒交俾女婿Barry,見證女兒進入人生另一個階段。
不過喺Yan成為人妻之前,Yan爸默默睇住女兒事業起伏,一直感到心噏,但完全唔敢問:「唔想加重佢負擔,所以我知道但唔會講出嚟,總之見到佢好,我梗係開心,但唔好就會心噏。」佢又話:「錫一個女,我其實樣樣都知,錫一個女喺心,唔係話要買乜,全部喺心,我得一個女,無理由唔錫。」
Yan就自負細個唔識諗,因為唔知父母因乜事離異,仲有諗會唔會自己有媽媽影子,所以爸爸唔鍾意自己,唔同佢講嘢。佢再忍住淚水話:「好深刻爸爸同我講,如果你工作唔如意,唔駛驚,最起碼爸爸有屋俾你住,我養你囉,我眼淚即刻係咁流,呢句說話入晒心。」
Yan再自爆10年前試過離家出走:「我真係唔記得乜嘢事,我只記得抱住狗狗走,話唔駛靠佢,隔咗一個星期,爸爸打嚟同我道歉,o氹我返去,o依家諗番覺得自己好差。」Yan爸就話:「佢嗰時喺房喊,好似為咗工作,一問佢就發脾氣走咗。」
不過,呢啲都係過咗去嘅事,Yan話o依家同爸爸感情好到爆燈。問Yan爸有乜要叮囑囡囡?佢諗都唔諗就話一定要改脾氣,同埋要學懂積穀防飢。咁結婚後再進一步,有冇打算幾時俾爸爸抱孫?Yan爸雖然把口話Yan同老公開心就得,但聽到個「孫」字即流晒口水話:「最好啦!」
最終爸爸一句「唔駛驚,我養你囉」,令Yan感動落淚。