林盛斌（Bob）今日帶埋三位千金到又一城出席奧比斯活動，日前佢喺社交平台透露「細佬」患病入院，唔少朋友誤會係佢自己，又有人以為係佢細佬有病，搞出唔少笑話。

其實入院係阿Bob 7個月大嘅細仔Jaye，早前佢因為支氣管炎入院，三個家姐都異口同聲就好掛住弟弟同媽咪。阿Bob透露細仔今日應該可以出院，但出院後都要隔離幾位小朋友，等佢哋唔好交叉感染，佢話﹕「叫佢哋以後咳都唔好對住細佬咳，細佬返嚟後都諗住隔離，唔好再傳染。其實去年佢哋都係病完一個到另一個，最慘係佢哋要一齊玩，易傳染。我今年許下願望，除咗事業外，最想係家人身體健康。」

問到復活節係咪冇得去旅行？阿Bob話﹕「佢哋媽咪幫佢哋安排咗好多活動，晏少少又去義賣做義工，好有意義。」談到護眼問題，Bob話﹕「大家姐同二家姐都冇玩平板電腦，但雙眼都有近視，可能係遺傳啦，佢哋o依家戴漸進鏡片，希望幫到護眼。」

精選娛聞，喺晒《娛果》
http://fb.com/appledailyent