本地薑康健國際（3886）噚日升咗9%，一年計，係大升咗10倍！同樣本地薑嘅位元堂（897）郁都未郁過，PB平霸全場，兼炒宏安（1222）係同氣連枝。
位元堂上年度，就算唔計非現金收益，賺咗近1億元，家陣得3倍幾PE，平霸全場。
而集團正喺元朗興建符合歐盟認證，一個比GMP更高標準嘅廠房。有「香港製造」呢個牌頭，廠房有更高認證標準，加埋位元堂正係拓展網購渠道，對中線開拓全球性客戶，好着數，爆炸力可大可小。

全系作風有變

但位元堂現價（0.205元）貼喺一年底，PB得0.3倍，又另一個平霸同時，同期阿媽宏安，已經翻咗一番。而上邊本地薑康健，經過呢一年勁升，家陣4倍PB，市值近50億元，係位元堂嘅8倍！「位元堂」品牌，真係只值咁多？
同阿媽宏安一樣，位元堂閒時伸手合股兼供股，大家都嚇怕。但係睇番紀錄，由2011年度（3月年結）開始，位元堂未有伸手動作，兼連續三個年度，keep住每股派0.3仙息。
又喺今年5月中，位元堂派完上年度成績單後，宏安以每股最少0.247元，成本最高0.269元，一路增持位元堂達1.35億股，權益由25%到29.5%，貼近全購水位。
位元堂現價比宏安最平入市價，仲係潛緊水。又掌舵人鄧清河，更加喺今年6月，以25%溢價全購宏安，成系作風似乎真係有啲改變。
買落後，炒同氣連枝，呢轉拎少少炒股贏到嘅錢（得一注半注本錢免問），走轉位元堂，當翻半番到0.32元計，PB得0.5倍，仍然係PB最平藥業股之一，又比起宏安最高增持成本價，唔係高好多。

錢雋
細價股專家
本欄逢周二、三、五刊出