奕達（2662）最近兩個月，大致喺2.65元至2.8元打底，趁整固，好收集。奕達係祖國印刷線路板裝配業EMS供應商，包括Panasonic、東芝及台灣華碩電腦旗下ASRock等等名牌，都係奕達大客，奕達夠晒份量級數。
要咁睇，最近幾年，亞洲企業外判成風，據估計，單係日本外判市場晒士，講緊係斷數十億美元計。外判市場風光無限，亦吸引到同樣係「EMS」供應商、美國巨無霸Flextronics（市值520億港銀）近年南征北討，開發亞洲市場。奕達貴為印刷線路板EMS龍頭企業，照理可以食正呢股外判風，應該肥仔水。
估計奕達06年度（6月止）純利2.9億銀，07年度3.3億銀，折合PE8倍，同類股平均PE講緊14倍或樓上。奕達追上同類股PE水位，現價（2.725元）潛在升幅係64%，要到4蚊樓上。

快炒中國星　博見0.455元

中國星（326）最近兩個月整咗個大三角，上星期五啱啱貼住三角阻力，又要昅昅。呢期有報道傳，話中國星計劃拓展濠江博彩中介人業務，濠賭股呢期撻着晒，中國星有進一步消息去向，固然係刺激股價嘅添加劑。
又中國星計埋上月配股攤薄效應，最新NAV講緊1蚊，現價（0.385元）相對折讓61.5%，唔炒消息，炒NAV折讓都夠照。快炒博見三角頂0.455元，潛在升幅近兩成，都幾肥仔。
錢雋