向來有「表情王」之稱的練馬師蘇偉賢，齋睇佢表情已經勝過千言萬語，因為冇任何文字可以比佢嘅表情來得更加傳神。

今日（23日）沙田日賽，蘇偉賢出馬八匹，擺明存心攻堅爭取頭馬，點知連場搏失，包括頭場「必定掂」末段被「航天勇將」擒下屈居第二；第六場「喜佳龍」心存大慾出冷，結果192倍跑梗頸四，已知今日蘇偉賢運氣認真麻麻。

去到第八場，蘇偉賢匹「威威心得」不敵「勝利歡星」及「夏威夷」跑第三；第九場「彪形猛漢」終點嗰步畀一對大摩馬「薈力之城」及「大風暴」趕過又只係得季軍，食到嘴邊都要嘔番出來。

再到尾場「八十八十」賽前亦被視為機會分子，點知輸到冇影，真係齋睇表情王嗰樣都知慘情。