周柏豪下晝喺銅鑼灣出席鞋履活動，仲同一早到場排隊買鞋嘅幸運fans合照，點知其中一個陰聲細氣，畫埋眼線，髮型及打扮同柏豪似到十足十嘅男fans，見到柏豪儼如螞蟻嬲蜜糖，起初柏豪都同佢攬住合照，點知男fans突然飛擒大咬，唔止攬實柏豪影相，仲轉個頭過去強吻柏豪。

此時柏豪被嚇到面容扭曲啦，佢左擰右擰，左閃右避，甚至出手擋住，再加埋工作人員幫手，先拉開咗位男fans咋。難得柏豪仲識笑住口話有「少少興奮」嚟打圓場。

佢之後訪問時話，比位fans錫到面珠仔，不過更刺激嘅都試過，就係佢曾經為鄭伊健演唱會做嘉賓，點知上到台個咪竟然失靈，事後先醒起唔記得裝香拜神喎。照咁睇，柏豪今日應該都係冇拜神所以有另類「艷福」喇。