卸妝測試shuuemuraCleansingOil最乾淨
模特兒阿Wing（王穎）一向百足咁多爪，經常要出Show出鏡，更試過擔任有線電視一個節目的主持，因為日日都要化妝，所以阿Wing對卸妝產品自然有一定要求。今次專程找她來測試幾款卸妝產品，選出哪款Make-UpRemover令阿Wing最滿意。
測試方法：
首先阿Wing化了一個至熱的SmokyLook，然後再用卸妝產品抹一下眼部的化妝。
卸妝王
shuuemuraBalancingCleansingOil
$230/150ml(又一城)
特色： 這款新推出的潔顏油，專為乾性皮膚而設，質地容易推開，同時更散發出陣陣橙皮及番茄香味。
阿Wing意見： 「這支卸妝油好正！一抹已經落到咁多眼影，而且感覺好潤，抹完唔會覺得繃繃緊，重有少少橙香㖭！」
最溫和
CliniqueCrystalClearCleansingOil
$150(銅鑼灣西武)
特色： 特別提煉的卸妝油，可以輕易卸除面部化妝，不需要用力拉扯皮膚。
阿Wing意見： 「效果唔差，輕輕抹已經抹甩好多EyeShadow，唯一唔好係樽口太大，好易倒多咗。」
最滋潤
KesalanPatharan完美卸妝油
$280(銅鑼灣三越)
特色： 除了能清除面部化妝外，更可以幫助溶解因油脂分泌過盛而產生的粉刺，同時有保濕作用。
阿Wing意見： 「易推開，一抹就甩咗好多顏色。不過稍嫌質地太油膩，如果油性皮膚就唔係咁啱用。」
最抵買
LaVie排毒淨白潔面乳
$58(萬寧)
特色： 含中草植物精華，有高度保濕成份的活性蛋白質，不但可以當成卸妝液用，更可以當潔面乳使用。
阿Wing意見： 「卸妝效果一般，要多抹幾次才乾淨，不過，佢可以當作洗面奶，一物兩用，加上價錢咁平，都係一個不錯的選擇。」
最清爽
EsteeLauderCompletelyClear卸妝油
$215(銅鑼灣LaneCrawford)
特色： 針對防水及具持久性的化妝，卸妝後用清水沖洗，不會感到油膩。
阿Wing意見： 「顏色不容易脫落，所以抹時要用力，好易抹到隻眼痛。不過質地好清爽，用落感覺唔錯。」
文員Jessica
「用開Covermark的卸妝液，貪佢夠大支，而且易抹易洗。」
化妝師劉小姐
「用緊shuuemura的保濕型潔膚油，好正，淡妝濃妝都好易清除，而且抹完好乾淨。有時工作時間緊迫，才會用卸妝棉幫模特兒落妝。」
秘書Kiki
「我用過市面上的卸妝棉，覺得抹得不夠乾淨。最近轉用Lancome的卸妝油，抹得乾淨好多。」
卸妝棉成新趨勢
以前卸妝只會想到用卸妝油或潔面乳，不過近年不少品牌相繼推出卸妝棉，只需用一塊布就可以把化妝清洗，的確好方便，尤其是對經常到外地旅遊的女士們。不過，暗瘡一族就可免則免，因為用卸妝棉清洗未必可避免接觸患處，是以容易刺激傷口。