明愛醫院見死不救事件搞到滿城風雨，行政總監馬學章初時死唔認錯，令事件火上加油，雖然其後由周一嶽打落多名高層連環道歉，但似乎仍未洗去市民心中憤恨。日前有網民喺facebook發起元旦日到明愛醫院遊行靜坐抗議，即刻一呼百應，有百幾人支持，而且網上成立咗好多群組狂轟明愛，唔知馬學章經過呢個聖誕，會唔會有所反省？

過百網友響應

明愛醫院事件後遺症，並未因政府同醫管局一條龍道歉而完結。facebook內近日出現唔同群組炮轟明愛，包括「強烈譴責明愛醫院見死不救」、「反對明愛不理病人死活，醫療管治落後封建」。有人更發起「全民遊行靜坐」，發起嘅網民話覺得大家應該做啲嘢，「不如元旦日遊行，時間係失救病人病發時間，終點係明愛醫院門口死者倒下地方，之後再靜坐。」有百幾個網民即刻回應add咗個group，有人聲言「一定到」。
至於死者兒子楊先生，立法會議員陳偉業一直有同佢聯絡。大嚿話，之前楊生話考慮告醫管局同明愛，呢一、兩日會再同佢見面，如果楊生決定告，就即刻去馬。