當年今日

體育開講:人話事vs話事人 - 馬啟仁

蘋果日報 2013/05/12 00:00


入戲院睇戲,故事有頭有尾,哪裏是頭是尾就睇導演點決定,結果係大團圓定大封相,佢話係咁就係咁,除非有日睇戲可自選結局,咁就人人可以決定想要乜結局。
球場有點不同,年年有局局新,踢嘅好睇嘅好都隨時可入局,亦隨時可出局,悉隨尊便。費爵退休之所以轟動,係因為佢已經好幾次可退而不退,人人都以為佢會死攬唔放直到永遠,卻突然在pat pat痛的陰影下就揮揮手了,在大世界人人鍾意鬥多之際,你終於見好就收,對好多朋友都係當頭棒喝,呢幾日身邊好似多咗啲朋友突然決定唔撈或轉工,唔知係咪都係受到費Sir感召。
費爵轟動之原因二,係因為佢真係喺世人面前,現場直播教足紅魔鬼26年。26年,差唔多包晒老中青3個不同世代嘅球迷,人人都睇慣睇熟佢副紅卜卜嘅尊容,同埋下巴不斷上落嘅嘴形,莫耶斯忽然空降,要博球迷受落嘅第一招,可能係搵番費爵咬開嗰隻香口膠來大咬特咬。
上年英超last一日最後1分鐘阿古路入波前,費爵其實可能已經心諗係時候來個happy ending嘞,點不知臨尾香咗,同佢心目中寫定嘅大結局榮休有啲出入,於是托一托眼鏡,咬一咬牙關,一於同你鍊多轉,勢估唔到今年曼城晨早甩轆,過咗終點仲有大把時間剩之下,皇上一於施施然退下。
英雄莫問出處,起點人人不同,但結局卻可以自己話事,之不過當社會洪流人浮於事,又有幾個夠膽主宰自己條事業線,文仙尼叻極但無論噚晚捧唔捧到個足總盃都好,佢響曼城地位亦已危在旦夕,當人人替佢抹一把汗時,佢就話仲未諗得明之前喺國米4年捧7個盃,點解仲會畀人炒咗,只怕佢不久之後,又多個炒魷疑惑。
莫耶斯接鄉里支棒,好多人認為係多得佢同聲同氣之背景,而佢自己就話其實從未諗過走,家陣聽來似乎係有啲符碌上位,不過相比起費爵20幾年前接艾堅遜班時,莫耶斯已經算係有說服力得多。喺未來呢幾年,當莫耶斯可能又係做緊紙板人時,佢要得到球迷與球員認同的話,成績以外就係要顯示出佢並唔係想賴死唔走。有冇獎盃佢都可以自己決定下一步,咁就有機會擺脫傀儡嘅形象,正如佢未來對手摩連奴一樣。
keyman
now TV主持
mailto:[email protected]