迷戀商台DJ麻利（鄧慧妍）嘅27歲陳姓的士司機，上周一晚喺九龍城茶餐廳打傷商台DJ當奴（唐劍康）、DJColin和監製Jacky，其中當奴甩骹兼穿頭，陳姓的士司機最後連人帶車失蹤44小時後被捕，而休息咗整整一星期嘅麻利今日正式復工，電台公關頭先2點鐘安排佢同傳媒見面，穿上民族裙嘅麻利睇起嚟精神奕奕。

麻利話案件已進入司法程序，所以唔方便講太多。問佢o依家仲會唔會好驚？佢就話唔驚喇！麻利話：「唔驚，因為知道佢喺邊度，o依家有相熟司機車我，司機都叫我唔好坐其他車喇！」

雖然已經唔再驚，但麻利諗返起成件事有心寒感覺，又話初初怕講出嚟冇人理，但知道好多人有相同經歷，佢仲話：「有事真係要講出嚟，唔可以自己哽晒，之前會怕人哋覺得自己唔係高，又唔係好受歡迎同生得靚，但其實呢啲事係冇原因，好多謝同事之前陪我同信任。」

今次當奴遇襲受傷，麻利坦言感到難受，覺得累咗其他人，因為大家都好無辜。問佢有冇叫公司加強保安？麻利就讚保安已經好好，佢每次離開電台都會幫佢先睇睇有冇可疑車輛。麻利又笑住話，今日自己一個人去食雲吞麵，結果俾同事話佢大膽，佢笑說：「我都要回復正常生活。」