【wONdEr|我做Marketing】最hurt下屬嘅四句話
WONDERwonderlands我做Marketing
每個人生命中都總會遇到幾個_街,畀佢哋hurt過無數次,鑊鑊新鮮鑊鑊甘。職場上hurt得你最多嘅人必定係你老細,佢哋有時會特登直接地去hurt爆你,亦有時係因為佢哋已經習慣咗將自己對眼放喺額頭上,所以經常hurt咗人都未必會知。以下四句,你又有冇聽過 / 講過出嚟hurt人呢?
一、「我唔理,你同我死掂佢」
呢句必定係排行榜首位,呢句包含咗兩個意思。第一,能力問題,工作出錯,上司或多或少喺「能力上」都有責任,因為前期嘅指揮工作做得唔好,所以先會令件事出錯;第二,責任問題,身為上司出咗事後想推卸責任,直接推畀啲細唔想理,同時間亦攞佢出去做擋箭牌。試問一個能力值有問題、又冇責任感嘅上司,點能夠服眾呢?
二、「講你又唔明,明你又唔做,做你又做錯」
呢句睇戲先會見,但原來有啲上司都好鍾意講。現實生活講出口其實係好衰,講到同事好似乜都係錯,直情唔應該出現喺呢個世界上咁。如果個同事真係咁差,你又請佢返來工作,當然唔排除見工時佢呃咗你,但如果問題真係嚴重,早就應該炒左佢,冇需要留住佢但又貶低別人到呢個地步。講少一句,畀個機會人,亦畀個機會自己。
三、「你估我啱定你啱呀嗱」
前輩多數都有豐富嘅經驗,再以經驗去教啲細做嘢,令佢哋行少啲冤枉路、錯少啲,但上司嘅經驗唔代表一定啱。好多發明家最初創造新事物時,都係冇前人嘅指點,亦冇任何太多嘅參考,自己一手一腳由零開始。唔係話前輩嘅話係錯,但新手嘅說話亦未必唔啱,有時前輩以既定嘅工作模式工作咗一段長時間後,往往未能夠跳出框框,而新人就能帶畀大家新嘅科技同諗法,衝擊大家嘅視野。
四、「做乜成日都OT」
講到同事好似好想OT咁,其實好多時係因為老細你一句不經意嘅「不如改改呢度」、「唔一定要改,但改咗好啲囉」,如是者同事就OT多2個鐘,你眼中嘅「改少少」,永遠都係牽連甚廣。而最乞人憎嘅係,當我哋晚晚OT到11、12點嘅時候,第二日遲到5分鐘你就「贈」我哋一句,再盡責嘅員工都會即刻畀你打沉。其實你咁講完又唔會解決到OT嘅問題,咁又何必呢~
「A君」可能係你生命中嘅_街,但你亦可能係其他人眼中嘅「A君」,做唔做「A君」,選擇在於你想點演繹職場上心目中嘅自己,同別人心目中的你。
專欄作者簡介:
我做Marketing
由Michael及Derek兩位marketer創立的媽劇停平台。撰寫市場及職場文章。著有《我做媽劇停》及《暖男之道》。
Facebook專頁:
https://www.facebook.com/iDoMarketingHK/
探索驚奇精彩的 wONdEr 故事,請LIKE 我們的Facebook Page,並設定為「搶先看」: https://www.facebook.com/wondermedia.hk/