政客係屁股指揮腦袋嘅行業，所以一定要好好照顧臀部，早前立法會行政管理委員會就尊貴議員對會議廳張凳嘅舒適程度進行民調，有52個議員回覆，當中超過一半（即28人）覺得家陣張凳唔夠舒服，坐得耐腰骨痛，又嫌扶手太闊，好阻碇，行出行入好唔方便。
既然議員唔滿意張凳，立法會決定一口氣換晒會議廳入面81張凳，新凳外形較為輕便，睇落似乎較符合人體力學，新凳每張盛惠3,300大元，換凳要花近27萬蚊。立法會趁暑假裝修，除咗換凳，仲換埋投票系統同地氈。八方未坐過議員張凳，唔敢講換凳係咪物有所值，不過換投票系統筆錢理應可以慳番，事關好多議員係橡皮圖章，實際由阿爺㩒掣。