劉嘉玲今晚喺中環出席電影《侏羅紀世界：迷失國度》嘅首映，對於林燕妮因肺癌病逝(新聞連結： https://bit.ly/2xOHrsC )，嘉玲就話：「有睇，同佢唔熟，好肯定知道佢係邊個，但係聽到呢個消息都唔會太愕然，呢個係人生必經，自己都有咁上下年紀，都聽得多，學習去面對。」

後來又講到著名時裝設計師Kate Spade受抑鬱症折磨而自殺身亡（新聞連結： https://bit.ly/2HoNP9y ），佢就話：「我唔知，呢啲病真係好可憐，可能太辛苦，所以選擇呢條路解決，都要多啲留意同關心呢啲病，身邊都有朋友，好似Lesile咁，佢係我好朋友，社會越嚟越多人有抑鬱症，可能因為壓力大，有可能係貧富懸殊，有好多原因，空氣都可能係一個問題，好多人釋放唔到呢啲問題，其實唔須要藥，大自然都可以治癒，自己都有好多問題，自己去行山，正面去解決，接受個問題，每個人都遇到問題發生。」

另外，嘉玲提到因為要綵排舞台劇《奪命證人》，所以早前去咗旅行充充電，小休將會投入綵排兼演出，嘉玲話：「今次嘅角色冇難度，o依家一路睇緊劇本，但係未背晒對白，好多對白係一氣呵成，同平時有啲唔同，所以今次係有啲挑戰要去面對，壓力一定會有，話冇就係假，呢啲係好玩嘅地方。」

嘉玲話嚟緊會去真法庭去睇下佢哋程序，有記者提佢到時喺法庭記住唔好影相，嘉玲話：「係咩？我入去嗰陣會有人提我，自己未去過香港法庭，大陸法庭我就去過。」

梁朝偉上星期喺香港首次出戰維港春季帆船賽贏咗亞軍，之後又去咗匈牙利參加比賽(新聞連結： https://bit.ly/2Jib7UJ )，唔知嘉玲會唔會撐老公？佢就話：「我會陪佢，不過要明年嘅事，好戥佢高興，好驚喜，無啦啦攞第二，聽佢啲玩風帆朋友講，佢好有天份，可能佢由細到大好鍾意海同水，平衡力又好，我都想去學吓，因為整件事好靚好型。」嘉玲仲話：「佢畀演戲擔誤咗，佢好有運動細胞。」

精選娛聞，喺晒《娛果》
http://fb.com/appledailyent