商場拆售潮出現暗湧，據報有買家上唔到會，皆因業主定價甚為進取，銀行借貸就好審慎。
好似尖沙嘴重慶站，同深水埗深之都，就有買家投訴，搵唔到銀行借錢，可能成交唔到。
負責搞分拆嘅中記話，好多銀行都肯為重慶站做按揭，諸如滙豐、中銀、星展咁，之但係估價約係成交價八成，貸款額為估價五至七成。例如一個百五萬細舖，銀行可能只肯放六十萬，即係樓價四成，買家要自掏九十萬至成交到。
中記話，深之都嘅按揭，重同銀行商量緊，暫時未定借貸額去到幾多。呢個場個幾月前拆售，賣咗七成，而重慶站就賣咗五成，業主封咗盤。
另外灣仔太原集個業主都封埋盤。
其實，近月拆售嘅商場，價錢拍住街舖，銀行估唔到價並唔出奇，買家要自保，惟有先問定銀行至好簽約。

羅家寶中環買酒吧
投資老手羅家寶，以五千五萬接咗個中環酒吧舖，回報有五厘幾，算係市場罕有。
個舖係德己立街二十七至三十九號A，千五呎，加九百呎閣樓，呎價三萬六，月租二十五萬，回報都算高。
核心區舖價高企，中環值得追落後。
同時，旺角最貴街道西洋菜街二Y二號舖，二百呎，上年三千四萬成交，後來取消，剛有個姓劉嘅投資者以三千五萬買入，十七萬五千蚊一呎。
買家有中資背景，近期買過砵蘭街舖，似乎幾睇好旺角舖市。