【無視港醫護】琼子讚強國檢測隊掖尿片日踩8小時 保皇班長鬧港人黐線唔感恩
武漢肺炎李八方online李慧琼廖長江全民檢測
港府大費周章堅持推行嘅全民檢測計劃進入第10天，反應依然一般。不過多名建制派議員，包括建制派班長廖長江、民建聯李慧琼同工聯會陸頌雄等人，就一同去到內地檢測支援隊下榻嘅酒店舉辦活動，「熱烈歡迎」佢哋來港檢測喎。
廖長江喺歡迎會上用普通話發言，講嚟講去都係三幅被，離不開感激、感恩，話檢測人員喺過程中嘅辛酸同血淚，令市民深受感動。佢臨尾仲提到，話除咗希望檢測人員遇上愉快嘅經歷之外，更希望檢測人員都感受到大部份香港市民都係正常嘅，受人恩惠都識得感恩，唔係全部都患上神經病喎，結果惹來一陣訕笑。
緊接發言嘅李慧琼就話，自己聽咗一個故事覺得好感動，話支援隊為咗讓市民盡快攞到結果，要分三班工作、24小時不停檢測，工作人員做8個小時冇得休息、冇得去廁所，然後突然用廣東話補多句：「佢哋係用尿片㗎！」
有網民見到兩人「精彩」嘅發言，就留言狠批，話其實香港醫護一樣咁辛苦，又唔見保皇黨讚，反而仲贊成減人哋資源；嘲笑李慧琼虛構故事。有人就話，好多香港人都連踩兩更，每日開工16個鐘，質疑檢測人員只係返8個鐘，係標準工時，感動乜嘢呢？另有人話，今次得嗰百零萬人驗，就話檢測人員無得休息，他日真係有500萬人驗，佢哋咪過勞死？有網民就突破「盲腸」，話係咪因為檢測人員唔識用座廁，所以先要掖尿片呢？
請纓做過「Dirty Team」（前線抗疫團隊）、照顧確診武漢肺炎患者嘅屯門醫院心臟科專科醫生黃任匡，就喺Facebook好感慨咁話，SoCO（社區組織協會）半年前喺記者會，用廣東話質問以罷工逼政府封關嘅香港醫護「係咪冇口罩就唔使做？」時至今日，李慧琼同陳建波就用普通話感謝大陸醫護「幫助香港走出疫情。每一位市民都衷心感謝。你們每一位都是英雄！」黃任匡仲話：「整個氣氛充滿了愛，一點噁心的感覺都沒有呢」。
-----------------------------
-----------------------------