當年今日
關於我們

【慌張西望】范冰冰條線的深度

蘋果日報 2015/04/27 06:00

范冰冰武則天慌張西望

有理由相信,TVB今鋪真係豁了出去,同你播足七日強國劇《武則天》,記憶中,就只有N屆前的世界盃才會晚晚播。為配合宣傳,還邀請主角范冰冰亮相無人問津的《今晚睇李》。按照范爺今時今日的國際地位,居然肯上三流節目同班主持癡癡呆呆一粒鐘,就知TVB有幾揼本同幾隆重其事。斷估你不會認為李思捷有天大面子,可在節目肆無忌憚的迫范爺玩無聊玩意,再取笑人家女大十八變嘛。話說回頭,明明范爺17年前早在黃金時段亮相,(亞視《還珠格格》),當年人家正到癲,又不見大台邀她上節目呢。

《武則天》,即係《武媚娘傳奇》,迄今最多人談論依然是那幾道消失了的事線業。大家成年人老實點,識睇梗係睇唐朝豪放女,要不然劇組也不會千挑萬選,找范冰冰、周海媚、張鈞甯、張馨予同一班不知名波濤洶湧的索女參演,貪她們演技出眾麼?我亦懷疑有幾多人,會因為對唐朝歷史定宮庭鬥爭有特別興趣,先至追睇劇集。所以,今次用「CGBanner」將事業線牢牢封實,已預計會流失大班毒男觀眾,按平日乜都要加插強姦戲、出浴戲的膠劇方程式,此舉實在很不TVB。亦因為此,你很難不陰謀論起來。

首先要搞清楚,當日是國家廣電總局下達封胸令。你說TVB不用盲從,兼可讓港人體現一國兩制可貴。但以今時今日的TVB,你認為他們有guts逆阿爺之意?再者,TVB覆蓋到華南地區,如果播出無加工版,讓冰冰條線重見天日,係就係恩澤了華南觀眾,卻製造出更多不公平現象。試問因為一條線而傷害民族感情,TVB又怎能承擔?他們當然不是傻的嗎,甚至會反過來視此為媚共之舉,你要潔淨,就乾脆給你潔淨到底,最重要是符合國情。這亦解釋為何TVB連播七日亦臉不改容,因為這或許是一項國家任務,直至你班港人被強國文化洗晒腦為止。到時,TVB每晚整套抗日英雄劇你嘆,除了說聲恭喜之外,都想不到說甚麼了。

也許,你應該明白冰冰條線,其象徵意義比其長度更深同遠。由TVB決定播出封胸版《武則天》一刻,你大概看得出他們今後的立場與取向。

撰文:杜秋棠@抽水站
https://www.fb.com/freakingwestlook