每個歌手身邊都有一個靈感嘅男神或者女神，佢會係創作動力，激發你想像嘅空間。有時可以分開一下，先知對方喺自己心命中有幾重!

講嘅就係……大陸歌手薛之謙，喺內地嘅受歡迎程度，拍得住陳奕迅喺香港嘅地位，憑搞笑風格，事業谷底翻身，由冇人識嘅組合「謙君一發」，改為單飛出道，發行專輯、開連鎖火鍋店、又有自家服務品牌，之不過較多人知嘅係佢喺2015年同太太高磊鑫離婚。

不過分開咗約兩年，終於復合喇!

薛之謙今日凌晨4點幾，喺微博貼出一男一女嘅影子相，留言：「我記得……你跟我時……我一無所有……我不想再尋覓了……請讓我給你所有……反正我們也不再年輕了……那就再愛一次吧……」幾句已深情講出二人情路!隨後，太太高磊鑫發微博：「多少淺淺淡淡的轉身，是旁人看不懂的情深...那麼，餘生請對我好一點。」

薛之謙同做model嘅高磊鑫於2005年左右相識，2009年薛之謙接受訪問堅稱兩人關係「只是好朋友」，直至翌年二人被影到一齊睇傢俬，2012年薛之謙曾發「奶奶和我玩真的了，要我今年結婚生孩子…」嘅微博，而高磊鑫就喺微博貼出辦婚禮相關嘅嘢，據知高磊鑫同薛之謙拍拖6年，當時薛之謙仲未走紅，亦冇人關心過薛之謙有冇結婚，但高磊鑫一直對薛之謙不離不棄，然而離婚之後，高磊鑫都多次喺微博感慨過去。

薛之謙亦有好多歌都係離唔開感情，有啲係自己嘅感情事，有啲係朋友嘅感情，相信薛之謙嘅歌都係同前妻有關，好似《一半》就係佢用心「沒有保留的紀念那些已逝的愛情」，可見二人一直係真心相愛。

有傳2015年，佢哋簽署離婚協議，薛之謙俾女方一千萬人仔，加上海嘅一棟樓。o依家再復合，唔少fans紛紛送祝福，希望二人餘生一起走到白頭。