第三十三屆香港電影金像獎提名名單今日公布，除咗最佳電影﹑最佳導演及影帝影后爭餐飽外，就連最佳男﹑女配角都鬥到火紅火綠。

今年最佳男配角提名包括：張晉《一代宗師》、佟大為《中國合伙人》、黃渤《西遊‧降魔篇》、彭于晏《激戰》及陳友《殭屍》；

而最佳女配角就有：羅蘭《掃毒》﹑劉嘉玲《狄仁傑之神都龍王》﹑李馨巧《激戰》﹑惠英紅《殭屍》及杜鵑《中國合伙人》。

睇下個名單，5個男配角提名中只得陳友係本地薑，睇嚟係佢同張晉之爭都唔定，陳友喺《殭屍》內飾演新潮道士，個一身浴袍孖煙囪Look，令人印象難忘，仲有一口非常親切嘅地道粗口，可能會令佢加唔少分；

而張晉就憑《一代宗師》演嘅形意拳高手「馬三」，令佢為人熟悉，唔再只係蔡少芬嘅老公，終於成功振夫崗，唔知佢可唔可以再下一城，拎返個獎威畀兩個女睇下呢？

而女配角戰況好似比較激烈，有同樣曾奪過金像獎最佳女主角嘅羅蘭姐、劉嘉玲同惠英紅，但係《激戰》嘅馬來西亞童星李馨巧都唔可以睇小，因為佢喺去年第16屆上海國際電影節，擊敗所有對手奪得最佳女演員，成為最年輕的金爵獎影后。

最佳男配角提名：
張晉《一代宗師》
佟大為《中國合伙人》
黃渤《西遊‧降魔篇》
彭于晏《激戰》
陳友《殭屍》

最佳女配角提名：
羅蘭《掃毒》
劉嘉玲《狄仁傑之神都龍王》
李馨巧《激戰》
惠英紅《殭屍》
杜鵑《中國合伙人》