以前好少聽人形容部車係五人車或二人車，不過自從七人車出現，突然車輛座位數量就成為一種車款的統稱，且大部份七人車千篇一律，大賣家庭Feel。但當我可以一口氣與Mazda5及Mazda8這對雙胞胎相聚了幾日幾夜，發現雖然同胎，但會有唔同個性呢！

記者：趙慧敏
攝影：陳陶鈞
Model：Hazel@GME

全家都話8仔最好

一連三日左擁右抱兩款七人車，不過屬同一車廠，心諗其實同揸一款車無乜分別！但貪心是天性，有得左擁右抱當然要試，首日就揀揸大架8仔，擁有4,860×1,850×1,685mm的天賦美態，投入龐大懷抱，令人舒服到唔捨得起身，我唔想做司機要做乘客，因為中排的兩個獨立座椅最得我歡心，加有手枕及可升降腳墊位，雖然皮料唔可以同歐洲車級數媲美，不過柔順舒適，絕對是平平哋都有豪華級享受。
有福當然唔可以獨享，搵埋屋企人一齊兜風，長輩話坐車最緊要舒服方便上落，阿媽最鍾意電動趟門，拉拉門柄車門自動開關，真正慳力！曳曳姪仔坐唔定，可以喺後排尾排兩邊走，因為中排位留有中央空間，出入二三排都好方便。一家大細做晒乘客，我總要做司機，好彩駕駛享受一流，最欣賞係充滿科幻味嘅儀錶板，藍光襯底，視覺享受一流，唔好以為七人車就一定老套保守！

Mazda8規格

引擎：2,261cc
馬力：163ps/6,500rpm
扭力：20.7kg-m/3,500rpm
傳動：五前速+/-自動波
售價：$321,800起

5仔散發靈活野性

車身充滿線條美的5仔，感覺剛柔並重，揸返工同接朋友去夜蒲就最啱！車身Size為4,585×1,750×1,615mm，比起8仔只屬中碼身形，中排舒適度不減，不過第三排空間就稍為狹窄，唔係經常坐滿七人，5仔反而更合用！不過親身體驗後，對經常用車的小家庭十分適合，偶然載多兩個人或摺叠尾排座椅，騰出尾廂空間擺放雜物，靈活性不俗，又唔會有揸大車帶來的煩惱，點計都化算。
至於操控感，2公升引擎最高輸出144匹馬力，用D波行車表現稍覺溫柔，不過轉用+/-波，可體驗其全車勁力，尤其是轉檔反應十分敏銳，住家男想放肆吓，多少能滿足你潛在的野性。

Mazda5規格

引擎：1,999cc
馬力：144ps/6,500rpm
扭力：18.4kg-m/4,500rpm
傳動：五前速+/-自動波
售價：$229,800起

查詢：28931112（萬事得汽車）