雨僑同王宗堯今日去到屯門，為大老闆蕭若元開設嘅藥房擔任宣傳嘉賓，即場向街坊派蛇羹同分享美容及保健心得，雨僑旗下嘅美容面膜產品亦同時喺店內上架。

樂壇頒獎禮陸續會舉行，雨僑近日都忙於拉票，原來今年佢同王宗堯有首合唱歌《埋頭苦幹》，不過由於王宗堯忙住為《選戰》做宣傳及拍戲，所以一直都冇時間宣傳，雨僑話:「呢排出去拉票，我都係要一個人分飾男女聲去唱，希望到頒獎禮時首歌真係得到獎。」問到王宗堯屆時會否出席頒獎禮？佢話:「我都未參與過音樂頒獎禮，有時間一定會出席，暫時自己冇打算唱埋歌，因為拍戲已經好忙，攰到把聲都爛埋。」雨僑都擔心頒獎禮上再要自己唱晒男女聲，當記者提議找同場男友羅力威上台合唱咪得，佢就哈哈大笑。

早前曾到金鐘佔領區同留言為絕食同學打氣嘅王宗堯，暫時未知幾時有時間再去支持學生，佢話:「我相信佢哋係未來主人翁，係未來楝樑，我哋要好珍惜佢哋。」