大台劇《幕後玩家》本來就係男人戲，點知有女角跑咗出嚟，最近呢兩集，被指一喊成名嘅龔嘉欣，得到網民一致好評，話佢有演技，而且喊功了得，嘉欣喊功獲網民激讚，8年苦功終於有收成。

前晚嗰集，小三劉佩玥喺嘉欣面前自爆同黃宗澤（Bosco）有婚外情，仲有埋BB，可憐嘅嘉欣被迫埋牆角，之後嘉欣喺張繼聰面前，抱頭痛哭，再返屋企面對出軌老公Bosco，傷心到淚如泉湧，真係睇見都想喊。

噚晚最激一幕，就要數劉佩玥硬闖靈堂，嘉欣怒睥對方，但係為咗大局着想，最終都係忍氣吞聲；反而飾演Bosco阿妹嘅莊思敏（Jacquelin）忍唔住狠摑呢個小三。

去到尾聲，嘉欣再施喊功，本來打算原諒老公出軌，點知Bosco出爾反爾，揚言話要齊人之福，堅持要照顧劉佩玥同肚入面嘅骨肉，講真邊個會接受到先？龔嘉欣見囡囡都在場，唔想驚動熟睡中嘅女，佢唯有強忍淚水，抑壓住哭聲，只係抱住女兒飲泣，呢一場表現真係超水準，難怪有網民力捧佢當選「最佳女配角」。

龔嘉欣係第一次做媽媽角色，莫講話觀眾，可能連佢自己都演唔慣，但據知嘉欣越做越投入，越嚟越入戲，嘉欣接受傳媒訪問話：「呢次係越級挑戰，最初都驚自己做唔嚟，好彩有Bosco同阿聰幫我入戲，可以快啲投入角色。」

至於Jacquelin噚日喺商台訪時，亦大讚嘉欣演技好，佢話：「o依家開始進入高潮位，龔嘉欣演得好好，見佢經常都要調整情緒處理喊戲，非常努力。」莊思敏話希望喺12月9號約埋一齊睇大結局。