鄭俊偉前季取得從練以來最佳成績，勝出40場，可能用得太盡，上季頭馬數字大跌超過一半，只得18W，不過亞軍次數卻有47次，經常搏殺失手以致影響成績，被謔為「鄭二哥」。當然大家最關心鄭俊偉今季能否走出谷底，想反彈最緊要有子彈，睇番鄭廐目前52駒（未計新來港T布馬），當中竟有35駒評分比上季初為低，換言之超過三份二馬匹在上季評分下調，減分馬數目是24廐中最多。
當中「勁友福」及「好爽趣」比對上季初下調30分，前駒上季初尚可於67分一出入Q，證明利跑新鮮，今季減到37分五班起步，只要跑回當日七成水準，已足以重開勝門。
至於「好爽趣」同樣比上季初下調30分，本身連番在泥地賽追近，唔排除係匹泥地特佳之馬，今季只評28分，五歲馬屆大熟期，於五班泥地賽必有作為。此外，「添歡笑」上季未有頭馬交出，由59分下調至40分，季尾在五班四戰悉數跑二至五名，證明已找到支持位。今季只要健康保持，可望重開勝門。