上次賽前曾經提過，今季潘頓接手其他騎師之全場最快末段時間馬成績甚佳，果然剛戰（11月28日）谷中同類馬「成才」順利獲勝。

周日（2日）沙田第三場四班1800米泥地賽，練馬師姚本輝旗下的「王者再現」屬最新一匹同類份子，改配潘頓跑番一戰即入Q之泥地1800米，值得高度重視。

翻查數據，今季共有七匹造出最快末段時間的馬，再出改由潘頓接手，成績是兩冠三亞一殿一第五，數據已說明一切，此類後勁馬獲潘頓垂青，甚少走樣。

「王者再現」前仗初跑泥地，角逐1800米即入Q，當時守在前領馬之後貼欄包廂位，算是賺了形勢。

上仗轉跑田草1800米，排11檔起步後留至包尾位置搵遮擋，形勢不利下，入直路移出望空即如飛殺上，最後只輸不足一身位跑第五，尾兩段23秒42及22秒58均屬全場最快，進一步證明本身四班能力及近況俱好。

今次「王者再現」換上潘頓執韁，此君今季策騎姚廐馬三次得兩亞一季不失三甲，睇配搭已知有搏殺決心。