當年今日
關於我們

【戰果速遞】卡路爾都翻生 莫耶斯果然係天才!

蘋果日報 2018/01/03 06:49

英超西布朗韋斯咸安祖卡路爾莫耶斯柏度英國足球

前曼聯領隊莫耶斯到底係唔係天才嘅爭論,嚟到呢一刻應該終於有肯定嘅答案喇。話說韋斯咸禮拜二晚喺護級大戰主場反勝西布朗2:1,袋晒三分後暫時跳出降班區域。
賽前排喺19位嘅西布朗,今場喺30分鐘由占士麥堅恩接應荷西朗頓嘅助攻入波,半場領先1:0。下半場,韋斯咸喺59分鐘由安祖卡路爾接應艾朗加斯威爾嘅傳中頂入,追平1:1。呢個亦係安祖卡路爾九個月以嚟嘅第一個士哥!
以為兩隊打和嘅時候,近五場英超入五球嘅阿拿奧杜域喺補時四分鐘助攻,今次入波嘅又係安祖卡路爾。一係就九個月唔入波,一係就90分鐘入兩粒。韋斯咸最終贏2:1,賽後以21戰得21分跳升第16位,暫時走出降班區,不過亦只係比排18位嘅史篤城多一分。唯一就係韋斯咸依家踢少一場,仲有搶分嘅機會,佢哋禮拜四會作客溫布萊鬥熱刺。
--------------------
BFB CHAMPIONS 2.0 新年活動大放送!每日免費11連抽!立即加入 http://bit.ly/2xrTKGM