一年一度「渣打馬拉松」噚日早上舉行，成朝落住雨，除咗一班跑手，約34位參加咗「領袖盃」嘅政商界名人都冒雨出戰。今年冠軍係前特首董建華嘅51歲長子董立均。
領袖盃由灣仔運動場至維園約1.8公里，董立均以9分12秒完成賽事。董立均現為東方海外（316）執行董事。佢從2013年開始跑渣馬領袖盃，2014年攞過季軍，今年終於奪冠。呢項比賽亞軍係創科（669）執董陳志聰（9分26秒）、季軍百德能董事總經理劉志敏（9分42秒）。
其實佢哋都算好彩，雖然成朝落雨，但到咗大約8點領袖盃開跑時，忽然停雨一陣，佢哋唔使淋住跑，只係賽前同埋頒獎時要淋雨。

大會又專登請來瑜伽教練，喺賽前帶佢哋做5分鐘熱身運動，現場見佢哋都好乖，跟足晒教練做動作，就算又凍又濕都唔怕抽筋喇。
今年首度參賽嘅一定係渣打集團（2888）行政總裁（CEO）Bill Winters，事關佢舊年中先至上任。聞說，Winters本來唔諗住參賽，後來見行程有時間，適逢今年係渣馬20周年，就決定落場感受下氣氛，志在參與，渣打大中華地區行政總裁洪丕正都有落場。