【韓流】想同Stephy合作 Jackson單拖開見面會媽咪現身撐
GOT7Jackson王嘉爾
韓國男團GOT7香港成員Jackson(王嘉爾),今日撇甩隊友,單拖現身觀塘出席粉絲見面會,吸引400粉絲見偶像,當中Jackson媽咪及Jackson嘅好朋友都有現身撐場,Jackson更咀媽咪,場面溫馨。
下午6時5分左右Jackson終於現身,粉絲立即尖叫,Jackson表示上次係同隊友一齊嚟呢度,今次就自己一個嚟宣傳,好多謝大家支持。當Jackson聽到粉絲由早上9點就嚟等時,Jackson搞笑表示:「等嘅時候係咪坐地下?有冇嘢墊住?唔好凍親個屁股。」非常貼心。
今個月就聖誕節,提到難忘嘅聖誕節時,Jackson表示:「同媽咪去濕平,因為大減價,同埋去睇燈飾。」Jackson又透露未來嘅工作計劃:「專注返做音樂,因為成日主持綜藝節目,驚畀人覺得我只係一個搞笑嘅人。」提到自己參與MV製作,又作曲填詞,Jackson就怕醜地打主持人,表示:「我覺得自己嘅作品係要自己做,所以都會親力親為。」
問到有冇覺得港迷特別親切時,Jackson就話:「其實全球粉絲都係咁親切,不過行香港會方便啲,因為冇人識。」粉絲立即大叫表示唔認同,Jackson就話:「大家圍埋喺呢度先咁多人,其實平時行街唔會有人識我。」
Jackson又指希望明年可以多啲返嚟香港,有粉絲就喺二樓拋咗Jackson母校件衫落嚟,Jackson勁開心,即指自己讀書時期最好嘅兩位朋友都有嚟呢度撐佢。
Jackson之後跟粉絲玩遊戲,粉絲要扮可愛時,Jackson隨即蹲喺地下望住,搞到粉絲勁怕醜,Jackson亦有握手及送抱冧粉絲。當粉絲玩第二個遊戲畫緊聖誕卡時,Jackson就趁機同其他粉絲傾偈,「食咗飯未?今日唔使返學咩?放學,記得做功課。」
第三個遊戲係要Jackson同粉絲合體做動作,其中一個係從後攬攬比心,令台下粉絲勁羨慕,Jackson仲搞鬼拉埋主持做呢個動作,場面HeHe。Jackson又話好鍾意呢個動作,因為未來有女友嘅話,會保護到女友。Jackson之後話想同埋其他粉絲玩,隨機揀左一位喺二樓嘅粉絲,不過該粉絲就冇落到嚟同偶像近距離接觸。
玩完遊戲,Jackson換衫表演solo歌《Papillon》,佢仲好好精力咁四圍走,甚至企喺櫈上。
事後Jackson接受訪問時,問到咁大方攬粉絲,怕唔怕媽咪嬲時,佢表示:「粉絲支持我哋,我哋咪盡力報答返佢哋,媽咪唔會嬲,係主持人話媽咪會嬲渣嘛,依家哥哥結咗婚又有小朋友,唔會催我嘅。(咁你又會幾時結婚拍拖?)等我成功可以照顧到父母,照顧到工作人員先再諗,依家忙到連瞓覺時間都冇。」問到分開活動隊友會唔會有怨言,Jackson:「大家都好支持大家,唔會有嘢講,因為大家都有自己嘅路。」
Jackson又話有機會都想拍香港劇集或電影,不過相比起偶像劇談情說愛嘅類型,佢更鍾意武打戲。至於想同邊位女藝人合作,Jackson:「咁我仲係新人,都未必到我揀,或者希望係由細睇到大嘅Stephy(鄧麗欣)、鍾嘉欣、Twins。」
更多韓流,喺晒《娛果》
http://fb.com/appledailyent